સુરતના બે વર્ષથી પણ નાની ઉંમરના બાળકે જીત્યા ‘ઇન્ડિયા બુક ઓફ રેકોર્ડ્સ’ અને ‘ઇન્ટરનેશનલ બુક ઓફ રેકોર્ડ્સ’ ના ખિતાબ – બાબર સમાજ અને ગુજરાતનું નામ કર્યું રોશન

June 16, 2026

આજના આધુનિક યુગમાં મોબાઈલ વિના જ માતાએ કર્યું બાળકનું ઘડતર

સુરત.
સુરત શહેરમાં રહેતા અને મૂળ જૂનાગઢ જિલ્લાના આંબલિયાળા ગામના પરમાર પરિવારના ૨ વર્ષથી પણ નાની ઉંમરના નાનકડા બાળકે પોતાની અસાધારણ બુદ્ધિપ્રતિભાના જોરે એક પછી એક બે મોટા રાષ્ટ્રીય અને આંતરરાષ્ટ્રીય રેકોર્ડ્સ પોતાના નામે કરીને સમગ્ર દેશ, ગુજરાત અને બાબર સમાજનું નામ ગૌરવથી રોશન કર્યું છે.

માત્ર ૧ વર્ષ અને ૯ મહિનાની નાની ઉંમરે કર્ણ મિથુનભાઈ પરમારે પોતાની અદભુત યાદશક્તિના કારણે ઇન્ટરનેશનલ બુક ઓફ રેકોર્ડ્સ તરફથી “SUPER TALENTED KID” (One In A Million) નો સત્તાવાર એવોર્ડ, મેડલ અને સર્ટિફિકેટ મેળવ્યા છે. આ પૂર્વે કર્ણ જ્યારે માત્ર ૧ વર્ષ અને ૮ મહિનાનો હતો, ત્યારે તેણે ‘ઇન્ડિયા બુક ઓફ રેકોર્ડ્સ’ (India Book of Records) માં પણ પોતાનું નામ નોંધાવીને પોતાની અસાધારણ પ્રતિભાનો પરિચય આપ્યો હતો. કર્ણે આટલી નાની ઉંમરે ફ્લેશકાર્ડ્સના માધ્યમથી અંગ્રેજી આલ્ફાબેટ્સ, વિવિધ ફળો, શાકભાજી, પાળતુ અને જંગલી પ્રાણીઓ, પક્ષીઓ, આકારો તેમજ વાહનોને બહુ જ સરળતાથી અને સચોટ રીતે ઓળખી બતાવીને આ અનોખી સિદ્ધિઓ હાસિલ કરી છે. કર્ણની આ બેવડી સિદ્ધિથી આખો બાબર સમાજ આજે ગર્વની લાગણી અનુભવી રહ્યો છે.

મૂળ જૂનાગઢ જિલ્લાના આંબલીયાળા ગામના વતની અને હાલ સુરતમાં સ્થાયી થયેલા પરમાર પરિવારના કર્ણના પિતા મિથુનભાઈ પરમાર સુરતમાં બારકોડ પ્રિન્ટરનો વ્યવસાય ધરાવે છે. આ સાથે જ કર્ણનું મોસાળ અમરેલી જિલ્લાનું કેરિયાચડ ગામ છે.પરિવાર દ્વારા જણાવ્યા અનુસાર કર્ણના નાનાજી મનસુખભાઈ કાનજીભાઈ ગોઢાણીયાએ કર્ણના જન્મ સમયે જ તેના નાનાજીએ સુવર્ણ (સોના) વડે બાળકની જીભ પર પવિત્ર ‘ૐ’ (ઓમ) લખીને ઉચ્ચ સંસ્કારોનું સિંચન કર્યું હતું અને પરંપરાગત ગોળથૂથ્થી પીવડાવી હતી. નાનાજી દ્વારા જન્મ સમયે અપાયેલા આ દિવ્ય સંસ્કારો અને આશીર્વાદ થકી આજે કર્ણની અસાધારણ બુદ્ધિશક્તિ અને યાદશક્તિના સ્વરૂપે ચમકી રહ્યા છે. બાળકની આ આંતરરાષ્ટ્રીય સિદ્ધિથી સુરત, જૂનાગઢ અને અમરેલી જિલ્લામાં ભારે ખુશી છવાઈ છે.

મોબાઈલ વગર ઘડાયું અસાધારણ મગજ – સમાજ માટે પ્રેરણારૂપ સંદેશ:

આજકાલ જ્યારે નાના બાળકોને મોબાઈલની લત લાગી ગઈ છે, ત્યારે કર્ણની આ સિદ્ધિ પાછળ એક અનોખી વાત એ છે કે તેના જીવનમાં તેની માતાએ તેને એક પણ વાર મોબાઈલ હાથમાં આપ્યો નથી. ડિજિટલ સ્ક્રિન અને મોબાઈલ ગેમ્સથી દૂર રહીને પણ બાળકને જીનિયસ બનાવી શકાય છે, તે આ પરિવારે સાબિત કરી બતાવ્યું છે.

“એક ભણેલી અને જાગૃત માતા, સો શિક્ષકની ગરજ સારે છે”

કર્ણની આ અદ્ભુત સફળતા પાછળ તેની માતા નેહલબેન પરમારની રાત-દિવસની સખત મહેનત અને યોગ્ય માર્ગદર્શન રહેલું છે. કહેવત છે કે ‘એક ભણેલી અને જાગૃત માતા, સો શિક્ષકની ગરજ સારે છે’, જેને નેહલબેને સાચી સાબિત કરી છે. એક શિક્ષકની જેમ તેમણે બાળકના અનોખા ટેલેન્ટને નાનપણથી ઓળખ્યું, સ્માર્ટફોનને બદલે ફ્લેશકાર્ડ્સ દ્વારા જ્ઞાન આપ્યું અને ખૂબ જ પ્રેમથી તેને આ રેકોર્ડ્સ માટે તૈયાર કર્યો. નેહલબેન તમામ માતા-પિતાને સંદેશ આપે છે કે બાળકોને મોબાઈલથી દૂર રાખીને તેમનું ભવિષ્ય ઉજ્જવળ બનાવો.

નાનકડા કર્ણની આ અદ્ભુત બેવડી સિદ્ધિ અને સમાજને પ્રેરણા આપતા આ કિસ્સાને આપના લોકપ્રિય ન્યૂઝ માધ્યમ’ દ્વારા વિના મૂલ્યે લોકો સુધી પહોંચાડવા નમ્ર વિનંતી છે.