રોજ 100થી વધુ OPD છતાં MBBS તબીબ ઉપલબ્ધ નહીં હોવાનો આક્ષેપ; વાયરલ તાવ-શરદી સહિતના કેસોમાં વધારો વચ્ચે લેબોરેટરી સેવા ખોરવાતા દર્દીઓ મુશ્કેલીમાં
રંઘોળા: ઉમરાળા તાલુકાના રંઘોળા ગામે આવેલ સરકારી પ્રાથમિક આરોગ્ય કેન્દ્રમાં છેલ્લા બે મહિનાથી CBC મશીન બંધ હોવાના આક્ષેપો સામે આવ્યા છે. એક તરફ હાલમાં ઉમરાળા તાલુકા સહિત સમગ્ર જિલ્લામાં વાયરલ તાવ, શરદી-ઉધરસ, ઝાડા-ઉલ્ટી સહિતના રોગચાળાના કેસોમાં વધારો નોંધાઈ રહ્યો છે, ત્યારે PHCની લેબોરેટરીમાં મહત્વપૂર્ણ CBC તપાસની સુવિધા બંધ રહેતા દર્દીઓને મુશ્કેલીનો સામનો કરવો પડી રહ્યો હોવાની રજૂઆતો ઉઠી છે.
સ્થાનિકોના જણાવ્યા મુજબ રંઘોળા PHCમાં દરરોજ 100થી વધુ દર્દીઓની OPD નોંધાઈ રહી છે. તેમ છતાં હાલ PHCમાં MBBS તબીબ પણ ઉપલબ્ધ ન હોવાનો આક્ષેપ કરવામાં આવ્યો છે. CBC મશીન છેલ્લા બે મહિનાથી બંધ હોવાનું અને ગ્રાન્ટના અભાવે મશીનની કામગીરી શરૂ થઈ શકતી ન હોવાનો પણ આક્ષેપ છે.
CBC તપાસ દર્દીઓના પ્રાથમિક નિદાનમાં મહત્વની હોવાથી તેની સેવા બંધ રહેતા દર્દીઓને ખાનગી લેબોરેટરીમાં તપાસ કરાવવા જવું પડે છે ખાનગી લેબોરેટરી વાળા દર્દીઓ પાસે ઉઘાડી લુંટ ચલાવી રહ્યા છે તેવી સ્થિતિ ઊભી થઈ હોવાની ફરિયાદો છે. ખાસ કરીને તાવ અને અન્ય વાયરલ બીમારીઓના કેસોમાં વધારો થઈ રહ્યો છે ત્યારે સરકારી આરોગ્ય કેન્દ્રની લેબોરેટરી સેવા તાત્કાલિક શરૂ કરવામાં આવે તેવી માંગ ઉઠી છે.
દરમિયાન, સ્થાનિક સ્તરે ચૂંટાયેલા પ્રતિનિધિઓ અને આરોગ્ય તંત્રની કામગીરી સામે પણ સવાલો ઉઠી રહ્યા છે. ધારાસભ્ય શંભુપ્રસાદ ટુંડિયા સહિતના ચૂંટાયેલા પ્રતિનિધિઓ દ્વારા રંઘોળા PHCની સમસ્યાઓ અંગે તાત્કાલિક ધ્યાન આપવામાં આવે તેવી માંગ કરવામાં આવી છે.
જિલ્લા પંચાયતના આરોગ્ય વિભાગના જવાબદાર અધિકારીઓ અને પદાધિકારીઓ દ્વારા પણ PHCની વાસ્તવિક સ્થિતિની મુલાકાત લઈ CBC મશીન સહિતની આરોગ્ય સેવાઓ ક્યારે શરૂ થશે તે અંગે સ્પષ્ટતા કરવામાં આવે તેવી માંગ ઉઠી છે.
સ્થાનિકોમાં ચર્ચાઈ રહેલા રાજકીય આક્ષેપો અંગે તંત્ર દ્વારા હકીકત સ્પષ્ટ કરવામાં આવે અને રંઘોળા PHCમાં પૂરતો તબીબી સ્ટાફ, લેબોરેટરી સુવિધા તથા જરૂરી સાધનો ઉપલબ્ધ કરાવી દર્દીઓને યોગ્ય સારવાર મળે તેવી માંગ ઉઠી છે.
રીપોર્ટ નિલેષ ઢીલા ઉમરાળા
