રિપોર્ટ: અનુજ ઠાકર
ગુજરાતી સિનેમાના ચાહકો માટે આ શુક્રવાર ખાસ બનવાનો છે, કારણ કે હળવી મજાક અને મનોરંજનથી ભરપૂર ફિલ્મ “સુરતી લોચો” દર્શકો સમક્ષ આવી રહી છે. ફિલ્મનો વિષય, કલાકારોની પસંદગી અને સંગીત—ત્રણેય પાસાં ફિલ્મને ચર્ચામાં રાખે છે.
આ ફિલ્મ વ્હાઇટ ક્લાઉડ ફિલ્મના બેનર હેઠળ પ્રોડ્યુસર સુમન જૈન અને ઉષા રાની જૈન દ્વારા નિર્માણ પામેલી છે. ફિલ્મનું દિગ્દર્શન સંજીવ જૈનએ સંભાળ્યું છે, જેમણે વાર્તા પણ પોતે જ રચી છે. સર્જનાત્મક દ્રષ્ટિકોણ અને પ્રસ્તુતિમાં નવીનતા લાવવાનો પ્રયાસ ફિલ્મમાં સ્પષ્ટ જોવા મળે છે.
ફિલ્મમાં મુખ્ય ભૂમિકામાં પરાગ માલમ, ગ્રેનસી કનેરિયા, પૂનમ શર્મા, નિમેશકુમાર મહેરીયા, રજનીશ રાણા અને હિમાંશુ પાઠક જેવા કલાકારો નજરે પડશે. દરેક કલાકાર પોતાના અનોખા અભિનય દ્વારા કથાને જીવંત બનાવે છે.
લેખન ક્ષેત્રે જાણીતા રાજ તલાવીયાએ ફિલ્મના ડાયલોગ, સ્ક્રીનપ્લે અને ગીતો તૈયાર કર્યા છે, જે ફિલ્મને મજબૂત ભાવનાત્મક અને મનોરંજક આધાર આપે છે. ફિલ્મનું દૃશ્યપટ સુંદર રીતે કેદ કરવા માટે ડી.ઓ.પી. વિરલ પટેલ (અન્નૂ પટેલ) જોડાયા છે, જ્યારે એડિટિંગનું કામ મુકેશ રૂપેલાએ સંભાળ્યું છે.
હાસ્ય, સંગીત અને મનોરંજનનો સમન્વય કરતી “સુરતી લોચો” આ શુક્રવારે સિનેમાઘરોમાં ધમાલ મચાવવાની તૈયારીમાં છે.
