બનાસકાંઠા, એબીએનએસ: નાબાર્ડ બનાસકાંઠા દ્વારા ડીસા તાલુકાના રાજપુર સ્થિત માળી સમાજની વાડી ખાતે બ્લોક/ધાબુ પ્રિન્ટના મહિલા કારીગરો સાથે આંતરરાષ્ટ્રીય મહિલા દિવસ ૨૦૨૫ની ઉજવણી કરાઈ હતી. જેમાં મહિલાઓની સિદ્ધિઓની ઉજવણી તથા આ વર્ષની મહિલા દિવસની થીમ “વચનોથી પ્રગતિ તરફ આગળ વધવું”ની હિમાયત કરાઈ હતી.
આ કાર્યક્રમ દરમિયાન કારીગર મહિલાઓ દ્વારા ડેમો રજૂ કરાયો હતો. સામાજિક સુરક્ષા યોજનાઓ જેમ કે PMSBY, PMJJBY, APY, વગેરે હેઠળ રસ ધરાવતા સહભાગીઓની નોંધણી અને નાણાકીય રીતે વંચિત કારીગરો માટે SB ખાતા ખોલવા માટે બેંક ઓફ બરોડા, ડીસા શાખામાંથી 2 બિઝનેસ કોરસપોન્ડન્ટ્સ (BCs)ની નિમણૂક કરીને બેંકર્સ ડેસ્કનું આયોજન કરાયું હતું.
આ કાર્યક્રમ દરમિયાન નાબાર્ડ ડીડીએમ-બનાસકાંઠા સુશ્રી શર્મિલા સંદીપ શેરલાએ આંતરરાષ્ટ્રીય મહિલા દિવસની ઉજવણીના ઇતિહાસ અને ડીસાના રાજપુર ક્લસ્ટરના બ્લોક/ધાબુ પ્રિન્ટની મહિલા કારીગરો સાથે “આંતરરાષ્ટ્રીય મહિલા દિવસ” ની ઉજવણીના હેતુ વિશે માહિતી આપી હતી. શ્રીમતી જાગૃતિ મહેતાએ પોતાના ભાષણમાં કારીગરોને તેમના ઉત્પાદનોના વેચાણ અને મુખ્ય પ્રવાહના માર્કેટિંગ વ્યવસ્થા સાથે જોડાણ ન હોવાની સમસ્યાઓ પર વિગતવાર ચર્ચા કરી. તેમણે નાબાર્ડ, EDII જેવી સંસ્થાઓ અને રાજ્ય સરકાર દ્વારા નાણાકીય/બિન-નાણાકીય સહાય દ્વારા આ કારીગરોને તેમના ઉત્પાદનોના માર્કેટિંગમાં મદદ કરવા પર ભાર મૂક્યો હતો. ડૉ. મીનલ મકવાણા અને EDII, અમદાવાદના અન્ય આદરણીય મહેમાનોએ પણ નાબાર્ડને આ કારીગરો સાથે સહયોગ કરવા અને તેમના ઉત્પાદનોના માર્કેટિંગ માટે નાણાકીય/બિન-નાણાકીય સહાય આપવા વિનંતી કરાઈ હતી.
આ કાર્યક્રમમાં ૧૦૦થી વધુ મહિલા કારીગરો સાથે કુ.જાગૃતિબેન મહેતા, કોર્પોરેટર અને પ્રમુખ-વાત્સલ્ય ટ્રસ્ટ, પાલનપુર, ડૉ. મીનલ મકવાણા, MIS નિષ્ણાત, EDII અમદાવાદ, શ્રી પી.એફ વણકર, માર્ગદર્શક, હસ્તકલા સેતુ યોજના, EDII, અમદાવાદ અને ભૂતપૂર્વ મેનેજર, ગરવી ગુર્જરી, ગુજરાત સરકાર, ઇન્દ્રવદન ચાવડા, રાજ્ય ઉદ્યોગ સહયોગ નિષ્ણાત, EDII, અમદાવાદ જેવા મહેમાનો ઉપસ્થિત રહ્યા હતા.
