પાલનપુર: આગામી તા. ૧૦ જૂન- ૨૦૨૩ના રોજ પાલનપુર ખાતે મુખ્યમંત્રીશ્રી ભૂપેન્દ્રભાઇ પટેલના હસ્તે નગરપાલિકાના જનસેવા કેન્દ્રનું લોકાર્પણ થનાર છે તથા પાલનપુર રામપુરા ચોકડી ખાતે મુખ્યમંત્રીશ્રીની જાહેર સભા યોજાનાર છે. આ કાર્યક્રમને અનુલક્ષી પાલનપુર કલેક્ટર કચેરી ખાતે કમિશનર ઓફ મ્યુનિસીપાલીટીઝ શ્રી રાજકુમાર બેનીવાલ અને બનાસકાંઠા જિલ્લા કલેક્ટરશ્રી વરૂણકુમાર બરનવાલની ઉપસ્થિતિમાં જિલ્લાના ઉચ્ચ અધિકારીઓની બેઠક યોજાઇ હતી. બેઠકમાં મુખ્યમંત્રીશ્રીના કાર્યક્રમની તૈયારીઓ અંગે કરવાની થતી કામગીરી અંગે વિસ્તૃત ચર્ચા અને આયોજનની સમીક્ષા કરવામાં આવી હતી.
આ બેઠકમાં જિલ્લા વિકાસ અધિકારીશ્રી સ્વપ્નિલ ખરે, પોલીસ અધિક્ષકશ્રી અક્ષયરાજ મકવાણા, નિવાસી અધિક કલેક્ટરશ્રી રીટા પંડ્યા, જિલ્લા ગ્રામ વિકાસ એજન્સીના નિયામકશ્રી આર.આઇ.શેખ, પ્રાંત અધિકારી અને મામલતદાર સહિતના સંબંધિત વિભાગના અધિકારીઓ ઉપસ્થિત રહ્યા હતા.
