સુરત: રમતગમતની સાથે સામાજિક જવાબદારીના સંગમ સમાન “રોટરી સંજીવની પ્રીમિયર લીગ – 3.0” (RSPL-3) નું ભવ્ય આયોજન રોટરી ક્લબ ઓફ સુરત ઈસ્ટ દ્વારા કરવામાં આવ્યું છે. આ ટુર્નામેન્ટ માત્ર ક્રિકેટનો ઉત્સવ નથી, પરંતુ યુવાધનને યોગ્ય દિશા આપવાનું એક સબળ માધ્યમ બની રહી છે.
નશા મુક્ત સુરતનો સંકલ્પ: આ વર્ષે RSPL-3 નું વિશેષ આયોજન “Say No to Drugs” થીમ અંતર્ગત કરવામાં આવ્યું છે. ટુર્નામેન્ટના માધ્યમથી સુરતના યુવાનોમાં નશાબંધી અંગે જાગૃતિ ફેલાવવાનો અને સ્વાસ્થ્યપ્રદ જીવનશૈલી અપનાવવાનો મજબૂત સંદેશ પાઠવવામાં આવી રહ્યો છે. રમતગમતના માધ્યમથી યુવા પેઢી વ્યસનમુક્ત બને તેવો ઉમદા અભિગમ સંસ્થા દ્વારા રાખવામાં આવ્યો છે.
મહાનુભાવોની ગૌરવવંતી ઉપસ્થિતિ:Bઆ ટુર્નામેન્ટમાં સુરત શહેરના પોલીસ કમિશનર શ્રી અનુપસિંહ ગેલોત, અગ્રણી ઉદ્યોગપતિ મુકેશભાઈ પટેલ (ગ્રીન લેબ), વિવિધ સામાજિક કાર્યકરો અને ઉદ્યોગ જગતના મહાનુભાવોએ વિશેષ હાજરી આપી ખેલાડીઓનો ઉત્સાહ વધાર્યો હતો. ઉપસ્થિત મહેમાનોએ રોટરી ક્લબના આ પ્રયાસની મુક્ત કંઠે પ્રશંસા કરતા જણાવ્યું હતું કે, રમતગમતની સાથે સામાજિક જાગૃતિના આવા આયોજનો સમાજમાં સકારાત્મક પરિવર્તન લાવવા માટે ખૂબ જ જરૂરી છે.
ટીમ વર્ક અને સફળ આયોજન: રોટરી ક્લબ ઓફ સુરત ઈસ્ટના પ્રેસિડેન્ટ કિરીટભાઈ વાંકડી અને સેક્રેટરી હિતેશભાઈ વેકરીયા ના માર્ગદર્શન હેઠળ આ આયોજનને સફળ બનાવવા માટે પ્રોજેક્ટ કો-ઓર્ડીનેટર જતીન કથીરીયા, વિશાલ સોજીત્રા તેમજ પ્રોજેક્ટ ચેરમેન નીતિન ધામેલિયા, હિરેન ક્યાડા, ભાવિક માલવિયા અને રાહુલ સાવજ સહિતની ટીમ દિવસ-રાત જહેમત ઉઠાવી રહી છે.
મેદાન પર ખેલાડીઓનો અદભૂત જોશ અને પ્રેક્ષકોની ભારે જનમેદની વચ્ચે RSPL-3.0 સુરતના રમત જગતમાં એક નવો ઇતિહાસ કંડારી રહ્યું છે.
