ભાવનગરના પેરા ટેબલ ટેનિસના આંતરરાષ્ટ્રીય ખેલાડી દંપતી અલ્પેશ સુતરીયા અને સંગીતા સુતરીયાએ દિવ્યાંગતાને મર્યાદા નહીં, પરંતુ સંકલ્પ અને સફળતાની નવી શક્તિમાં પરિવર્તિત કરી એક જ સમયગાળામાં બેવડી સિદ્ધિ હાંસલ કરી છે. તા. ૧૨ ઓગસ્ટ, ૨૦૨૬ના રોજ રાજ્યકક્ષાના પ્રતિષ્ઠિત એવોર્ડથી સન્માનિત થયા બાદ બંને ખેલાડીઓએ રાષ્ટ્રીય કક્ષાની પેરા ટેબલ ટેનિસ રેન્કિંગ ચેમ્પિયનશિપમાં પણ ઉત્કૃષ્ટ દેખાવ કરી ભાવનગર સહિત સમગ્ર ગુજરાતનું ગૌરવ વધાર્યું છે.
ગુજરાત સરકારના Sports Authority of Gujarat દ્વારા ગાંધીનગરના મહાત્મા મંદિર ખાતે યોજાયેલા એવોર્ડ સમારોહમાં નાયબ મુખ્યમંત્રી શ્રી હર્ષ સંઘવીના હસ્તે અલ્પેશ સુતરીયાને ‘એકલવ્ય સિનિયર એવોર્ડ’ અને સંગીતા સુતરીયાને ‘સરદાર પટેલ સિનિયર એવોર્ડ’ એનાયત કરવામાં આવ્યા હતા.
આ સન્માનની ખુશી સાથે જ બંને ખેલાડીઓએ પોતાની રમતની પ્રતિભાનો રાષ્ટ્રીય સ્તરે પણ પરચો આપ્યો હતો. તા. ૧૨ અને ૧૩ ઓગસ્ટ, ૨૦૨૬ દરમિયાન મધ્યપ્રદેશના ઈન્દોર ખાતે અભય પ્રશાલમાં યોજાયેલી First Para Table Tennis National Ranking Championship 2026-27માં અલ્પેશ સુતરીયાએ ક્લાસ-૧ કેટેગરીમાં બ્રોન્ઝ મેડલ પ્રાપ્ત કર્યો હતો, જ્યારે સંગીતા સુતરીયાએ ક્લાસ-૪ કેટેગરીમાં ટોપ-૬માં સ્થાન મેળવી નોંધપાત્ર સિદ્ધિ હાંસલ કરી હતી.
શારીરિક પડકારો સામે અડગ મનોબળ ૮૦ ટકા દિવ્યાંગતા ધરાવતા અલ્પેશ સુતરીયા પેરા ટેબલ ટેનિસની ક્લાસ-૧ કેટેગરીના આંતરરાષ્ટ્રીય ખેલાડી છે. વ્હીલચેર સહિતના શારીરિક પડકારો વચ્ચે પણ તેમણે સતત મહેનત, શિસ્ત અને અડગ મનોબળના બળે રાષ્ટ્રીય અને આંતરરાષ્ટ્રીય સ્તરે ભારતનું પ્રતિનિધિત્વ કરી અનેક સિદ્ધિઓ મેળવી છે.
એ જ રીતે, ૭૬ ટકા દિવ્યાંગતા ધરાવતા સંગીતા સુતરીયા પેરા ટેબલ ટેનિસની ક્લાસ-૪ કેટેગરીના આંતરરાષ્ટ્રીય ખેલાડી છે.
રમત પ્રત્યેની પ્રતિબદ્ધતા અને સતત અભ્યાસના પરિણામે તેમણે પણ વિવિધ રાષ્ટ્રીય અને આંતરરાષ્ટ્રીય સ્પર્ધાઓમાં ઉત્કૃષ્ટ પ્રદર્શન કરી દેશ અને ગુજરાતનું ગૌરવ વધાર્યું છે. સન્માનથી મેડલ સુધી સંકલ્પની સફળ સફર
એક તરફ રાજ્ય સરકારના પ્રતિષ્ઠિત એવોર્ડથી સન્માન અને બીજી તરફ રાષ્ટ્રીય રેન્કિંગ ચેમ્પિયનશિપમાં મેડલ સહિતની સિદ્ધિ અલ્પેશ અને સંગીતા સુતરીયાની આ બેવડી સફળતા તેમની દૃઢ ઇચ્છાશક્તિ અને રમત પ્રત્યેના સમર્પણના સાક્ષી છે.
આ દંપતી ખેલાડીઓની સફર એ સંદેશ આપે છે કે શારીરિક પડકારો સફળતાના માર્ગમાં અવરોધ બની શકતા નથી. મજબૂત મનોબળ, સતત પરિશ્રમ અને અડગ સંકલ્પ હોય તો પડકારોને પણ સિદ્ધિની સીડી બનાવી શકાય છે.
અલ્પેશ અને સંગીતા સુતરીયાની આ સિદ્ધિ માત્ર તેમના પરિવાર કે ભાવનગર માટે જ નહીં, પરંતુ રાજ્યના અન્ય તમામ ખેલાડીઓ માટે પણ પ્રેરણારૂપ બની છે. તેમની સફળતાએ રમતગમત ક્ષેત્રે દિવ્યાંગ ખેલાડીઓની પ્રતિભા અને ક્ષમતાને નવી ઓળખ અપાવી છે.
આ ગૌરવપૂર્ણ સિદ્ધિ બદલ પરિવારજનો, રમતગમત ક્ષેત્રના આગેવાનો, મિત્રો તથા ભાવનગરના રમતપ્રેમીઓએ બંને ખેલાડીઓને અભિનંદન પાઠવ્યા છે. આગામી સમયમાં પણ રાષ્ટ્રીય અને આંતરરાષ્ટ્રીય કક્ષાએ વધુ શ્રેષ્ઠ પ્રદર્શન કરી દેશ અને ગુજરાત માટે વધુ મેડલ અને ગૌરવની ક્ષણો સર્જવાનો સંકલ્પ બંને ખેલાડીઓએ વ્યક્ત કર્યો છે.
દિવ્યાંગતા સામે નહીં, સંકલ્પ સાથે આગળ વધીએ, અલ્પેશ અને સંગીતાની સફળતા આ જ સંદેશને સાકાર કરે છે.
