અમદાવાદ, સંજીવ રાજપૂત, એબીએનએસ: અમદાવાદ સાયબર ક્રાઈમ બ્રાન્ચે ગુજસેલ એરપોર્ટ અને શાળાઓને બોમ્બથી ઉડાવી દેવાની ધમકી આપનાર આરોપીની ધરપકડ કરી લેવામાં આવી છે. આરોપી તરીકે 40 વર્ષીય ભાવેશ અમૃતભાઈ પટેલની ઓળખ થઈ છે. તપાસમાં સામે આવ્યું છે કે આરોપીએ “[email protected]” આઈડી પરથી એરપોર્ટ ઓથોરિટીને ધમકીભર્યો ઈ-મેલ મોકલ્યો હતો.
પ્રાથમિક તપાસ મુજબ આરોપી ભાવેશ પટેલ અગાઉ એરપોર્ટ પર મેનેજમેન્ટ સાથે સંકળાયેલો હતો તેમજ કન્સ્ટ્રક્શન અને ઈવેન્ટ મેનેજમેન્ટના વ્યવસાય સાથે જોડાયેલો છે અને તેની મહિલા મિત્ર ઈવેન્ટ મેનેજમેન્ટ ક્ષેત્રમાં કામ કરતી હતી અને અંગત અદાવતને કારણે આ ધમકીભર્યો મેઈલ મોકલાયો હોવાની માહિતી સામે આવી છે.
આરોપીએ 25 માર્ચ 2026ના રોજ મોકલેલા મેઈલમાં ગુજસેલ એરપોર્ટને EID મારફતે ઉડાવી દેવાની ધમકી આપી હતી તેમજ અગાઉ અમદાવાદ સાઇબર ક્રાઈમ દ્વારા ધરપકડ કરાયેલા સૌરભ વિશ્વાસને મુક્ત કરવાની માંગણી કરી હતી. નોંધનીય છે કે અંદાજે ત્રણ મહિના પહેલા સાયબર ક્રાઈમે ધમકીભર્યા મેઈલ કેસમાં સૌરભ વિશ્વાસ નામના આરોપીની ધરપકડ કરી હતી.
લવિના સિન્હા, ડીસીપી, સાયબર ક્રાઈમના જણાવ્યા મુજબ સાયબર ક્રાઈમ પોલીસે ટેકનિકલ એનાલિસિસ અને હ્યુમન ઈન્ટેલિજન્સના આધારે આરોપી ભાવેશ પટેલનું અમદાવાદ શહેરમાંથી લોકેશન ટ્રેસ કરી તેને ઝડપી પાડ્યો હતો. પોલીસે આરોપીનો મોબાઈલ ફોન જપ્ત કર્યો છે, જેમાંથી રિસાયકલ બીનમાં ડિલીટ કરાયેલ ધમકીભર્યો ઈ-મેલ પણ મળી આવ્યો છે.
પોલીસ હાલ આરોપીના રિમાન્ડ મેળવી વધુ તપાસ કરી રહી છે કે આ ગુનો પાછળનું ચોક્કસ કારણ શું હતું, તેમાં અન્ય કોઈની સંડોવણી છે કે નહીં, તેમજ આરોપી કોઈ આતંકવાદી સંગઠન અથવા દેશવિરોધી પ્રવૃત્તિ સાથે જોડાયેલો છે કે કેમ તેની પણ તપાસ હાથ ધરાઈ છે. બોમ્બથી ઉડાવી દેવાની ધમકી આપી છેલ્લા કેટલાય મહિનાઓથી પોલીસ અને લોકોની ઊંઘ હરામ કરી નાખનાર આરોપીને આખરે સાયબર ક્રાઈમ દ્વારા ધરપકડ કરી લેવામાં સફળતા મળી છે જે માટે સાયબર ક્રાઈમ ખરેખર અભિનંદનને પાત્ર છે.
