HPV સંક્રમણથી બચાવ અને સર્વાઇકલ કેન્સરની રોકથામ અંગે જાગૃતિ વધારવાની પહેલ
પશ્ચિમ રેલવેના ભાવનગર મંડળમાં મહિલા આરોગ્ય તથા નિવારક તબીબી સેવાઓને પ્રોત્સાહન આપવાના ઉદ્દેશ્યથી 03 ઓક્ટોબર, 2026ના રોજ મંડળ રેલવે હોસ્પિટલ, ભાવનગર ખાતે HPV (Human Papillomavirus) રસીકરણ અભિયાનનું સફળ આયોજન કરવામાં આવ્યું હતું. આ અભિયાન મંડળ રેલવે મેનેજર, ભાવનગર મંડળ શ્રી દિનેશ વર્માના માર્ગદર્શન હેઠળ યોજાયું હતું. અભિયાનનો મુખ્ય ઉદ્દેશ HPV સંક્રમણથી બચાવ, સર્વાઇકલ કેન્સરની રોકથામ તેમજ મહિલા આરોગ્ય અંગે જાગૃતિને પ્રોત્સાહન આપવાનો હતો.
અભિયાન દરમિયાન કુલ 59 HPV રસીના ડોઝ આપવામાં આવ્યા હતા. જેમાં 14 લાભાર્થીઓને પ્રથમ ડોઝ તથા 45 લાભાર્થીઓને બીજો ડોઝ આપવામાં આવ્યો હતો. રસીકરણ સાથે લાભાર્થીઓને HPV સંક્રમણથી બચાવ, રસીકરણનું મહત્વ તથા આગામી ડોઝની સમય સૂચિ અંગે જરૂરી આરોગ્ય શિક્ષણ અને પરામર્શ પણ આપવામાં આવ્યા હતા.
આ પ્રસંગે વરિષ્ઠ મંડળ વાણિજ્ય પ્રબંધક શ્રી અતુલ કુમાર ત્રિપાઠીએ જણાવ્યું હતું કે HPV રસીકરણ જેવા નિવારક આરોગ્ય અભિયાનો દ્વારા રેલવે કર્મચારીઓ અને તેમના પરિવારોમાં આરોગ્ય અંગે જાગૃતિ વધારવામાં તેમજ ગંભીર બીમારીઓની રોકથામમાં મહત્વપૂર્ણ યોગદાન આપી શકાય છે.
અભિયાનના સફળ આયોજનમાં મુખ્ય તબીબી અધિક્ષક ડૉ. મનોજ કુમારના અસરકારક નેતૃત્વ, માર્ગદર્શન અને સતત પ્રોત્સાહનની મહત્વપૂર્ણ ભૂમિકા રહી હતી. અભિયાનનું આયોજન અને સંકલન શ્રી અમૃત મરેઠા, મુખ્ય નર્સિંગ અધિક્ષક દ્વારા કરવામાં આવ્યું હતું. તેમણે લાભાર્થીઓને HPV રસીકરણના લાભો, સંક્રમણથી બચાવના ઉપાયો તથા રસીકરણ સંબંધિત જરૂરી માહિતી પૂરી પાડી અને સમગ્ર પ્રક્રિયાને વ્યવસ્થિત તથા સુચારુ રીતે પૂર્ણ કરાવી હતી.
મંડળ રેલવે હોસ્પિટલ, ભાવનગર દ્વારા આ અભિયાનના માધ્યમથી “રોકથામ એ સારા આરોગ્યની ચાવી છે”નો સંદેશ અસરકારક રીતે પ્રસારિત કરવામાં આવ્યો હતો. આ પહેલ રેલવે કર્મચારીઓ તથા તેમના પરિવારો માટે નિવારક, જાગૃતિમૂલક અને ગુણવત્તાસભર આરોગ્ય સેવાઓ ઉપલબ્ધ કરાવવાની દિશામાં ભાવનગર મંડળની પ્રતિબદ્ધતાને દર્શાવે છે.
