અમદાવાદ, સંજીવ રાજપૂત, એબીએનએસ: અમદાવાદ સાતમા નોરતે શહેરના શેરી ગરબાએ રંગ રાખ્યો. સોસાયટીમાં ગરબાના તાલે લોકોએ ગરબાની રમઝટ જમાવી..
રાજ્યમાં નવલી નવરાત્રીના ગરબા તેમના છેલ્લા તબક્કા પહોંચી રહ્યા છે ત્યારે પાર્ટીપ્લોટના ગરબાને નેવે મુક્તા અમદાવાદમાં સોસાયટીના શેરી ગરબાએ ભક્તિમય રંગ રાખ્યો છે.
અમદાવાદના આર સી ટેક્નિકલ પાસે ઘાટલોડિયા ખાતે આવેલ શિવમ આરકેડમાં છેલ્લા 15 વર્ષથી અહીં રહેતા પરિવારના સભ્યો શક્તિ અને ભક્તિ સાથે નવરાત્રીના ગરબા મહોત્સવને ભક્તિમય બની ઉજવે છે. અહીં રહેતા વિવિધ સમાજના લોકો અને તેમની દીકરીઓ પાર્ટીપ્લોટમાં પૈસા આપી ગરબા રમવા જવા કરતા પોતાને આંગણે જ એક પરિવાર સાથે ગરબા રમી આ પર્વને ઉજવે તે માટે મક્કમ બન્યા છે. અહીંના રહીશો એક સાથે માં જગદંબાની આરાધના સાથે સાથે ગુજરાતની સંસ્કૃતિ અને પ્રાચીન ગરબાની મહિમા જાળવી રાખતા મુક્ત રીતે સુરક્ષિત બની ગરબા ગીતોના તાલે ગરબા રમતા જોવા મળે છે. મોંઘાદાટ કપડાંનો દેખાડો કરવા કરતાં સાધારણ પણ પોતાનો પોશાક જ પોતાની આગવી ઓળખ ધરાવતા અહીંના રહીશો દ્વારા અનેક ઉત્સવને એકસાથે એક છત નીચે જ ઉજવવામાં આવે છે. આ ઉપરાંત તેઓ દીકરીઓ બહાર ન જાય કોઈ મુશ્કેલી નો સામનો ન કરવો પડે તે માટે સોસાયટીમાં જ નવરાત્રીનો પર્વ હર્ષોઉલ્લાસ સાથે ઉજવાય તેવા આગ્રહ સાથે ગરબા મહોત્સવનું ભવ્ય આયોજન કરવામાં આવે છે.
આજે પાર્ટીપ્લોટના ગરબાને ટક્કર મારતા શેરી અને સોસાયટીના ગરબાનું મહત્વ ફરી વધતું જઈ રહ્યું છે જ્યાં રહીશો આ ભક્તિમય પર્વની મર્યાદા અને સંસ્કૃતિ જળવાઈ રહે તેવા પ્રયાસો સાથે સજાગ બન્યા છે. મોંઘા પાસના પૈસા આપી ગરબા રમવા જવા સાથે એમની ચિંતા કરતા માતાપિતા પણ હવે પોતાની સોસાયટીમાં પરિવાર સાથે તેમની સામે જ ગરબાના મહોત્સવને ઉજવતા જોવા મળી રહ્યા છે.
આજે નવલી નવરાત્રીની ભક્તિનો સાચો મહિમા અને તે સંસ્કૃતિનો વારસો જળવાઈ રહે તે માટેના પ્રયાસો અનેક સોસાયટી અને ફ્લેટસના લોકો પાર્ટી પ્લોટ જેવું જ વાતાવરણ પોતાને ત્યાં જ ઉભું કરી એકમળી પોતાના પરિવાર સાથે આ ભક્તિમય પર્વને આરાધના સાથે ઉજવી રહ્યા છે.
રહીશોનું માનવું છે કે આજની યુવા પેઢી આ ગરબાનું મહત્વ સમજે અને તે પરંપરા ને આવનાર સમયમાં પણ જીવંત રાખે તેવો તેમનો સતત પ્રયાસ રહે છે. શહેરમાં લુપ્ત થતા પ્રાચીન ગરબાનું મહત્વ આવી સોસાયટીઓના આયોજન થકી સાચા અર્થમાં નવરાત્રીના આરાધ્ય પર્વ નવલી નવરાત્રીના સાચા મૂલ્યને દર્શાવશે એ દિવસો હવે દૂર નથી.
