જામનગર: રાજ્યમાં સાર્વત્રિક વરસાદનો માહોલ જામ્યો છે ત્યારે સૌરાષ્ટ્રમાં પણ મેઘરાજા ખૂબ જ મન મૂકી વરસ્યા છે ત્યારે જામનગર જિલ્લાનો જીવાદોરી ગણાતો રણજિત સાગર ડેમમાં પણ ઉપરવાસમાંથી પાણી આવતા તેમાં પણ નવા નિરનું આગમન થતાં જ ડેમ તેની સપાટીએ છલકાતો જોવા મળ્યો હતો ડેમ માં આવેલ નવા નિરના જામનગર મ્યુનિસિપલ કોર્પોરેશનના સત્તાધીશો દ્વારા વધામણાં કરવામાં આવ્યા હતા. શહેરના પ્રથમ નાગરિક ગણાતા મેયર હસમુખભાઈ જેઠવા તેમજ ડેપ્યુટી મેયર દ્વારા રણજિત સાગર ડેમ ની મુલાકાત લઈ પુષ્પ તેમજ નારિયેળ વધેરી લોકો માટે જીવન આપનાર નવા નિરના વધામણાં કરવામાં આવ્યા હતા. આ પ્રસંગે જામનગર શહેરના વોર્ડ કોર્પોરેટરો, કમિટી સભ્યો, દંડક, ચેરમેન વગેરે ખાસ ઉપસ્થિત રહ્યા હતા. છેલ્લા 2 દિવસો માં જામનગર શહેરમાં આશરે 9 ઇંચ જેટલો વરસાદ ખાબક્યો છે અને સિઝનનો અંદાજે 50 ટકા વરસાદ નોંધાયો છે. નવા નીર આવતા અને ડેમ છલકાતા શહેરના લોકોને પીવાના પાણીની સમસ્યા હળવી બની છે. આ ઉપરાંત શહેરના સરસોઈ અને ઉણ ડેમ પણ ઓવરફ્લો થયાં છે જેથી આવનાર 1 થી દોઢ વર્ષ સુધી જામનગર શહેરની પ્રજાને પાણી પૂરતા પ્રમાણમાં મળી રહેશે. આ પહેલા જિલ્લા કલેક્ટર પણ રણજિત સાગર ડેમની મુલાકાત લઈ ચુક્યા છે અને તેમણે પણ આવનાર પાણી ની સ્થિતિને નિહાળી હતી.
સંજીવ રાજપૂત
