નારી વંદન ઉત્સવ અંતર્ગત ભાવનગર જિલ્લાના ગારિયાધાર તાલુકાની ICDS કચેરી ખાતે ‘મહિલા, બાળ અને આરોગ્ય દિવસ’ની ઉજવણી કરવામાં આવી હતી. આ પ્રસંગે કિશોરીઓની હિમોગ્લોબિન તપાસ, માસિક સ્વચ્છતા અંગે જાગૃતિ તથા હાઈજીન કીટનું વિતરણ કરવામાં આવ્યું હતું.
કાર્યક્રમમાં જિલ્લા મહિલા અને બાળ અધિકારીશ્રી આર.કે. જાખણીયા, ડૉ. દ્રષ્ટિબેન, CDPO શ્રી કલ્પનાબેન, સુશ્રી ગુલાબેન સાવલીયા તથા DHEWના મિશન કોઓર્ડિનેટર શ્રી સંજયભાઈએ કિશોરીઓ સાથે સંવાદ કરી પોષણયુક્ત આહાર, વ્યક્તિગત સ્વચ્છતા અને સ્વસ્થ જીવનશૈલી અંગે ઉપયોગી માહિતી આપી હતી. ઉપરાંત પૂર્ણા યોજના સહિત મહિલાઓ અને કિશોરીઓ માટેની વિવિધ સરકારી યોજનાઓ તથા સ્વાવલંબનની તકો વિશે જાણકારી આપવામાં આવી હતી.
કાર્યક્રમનો મુખ્ય ઉદ્દેશ કિશોરીઓને કિશોરાવસ્થામાં જરૂરી આરોગ્યલક્ષી બાબતો અંગે યોગ્ય સમજ આપી તેમના સશક્તિકરણ તરફ પ્રોત્સાહિત કરવાનો રહ્યો હતો.
કાર્યક્રમમાં આરોગ્ય વિભાગની ટીમ, CDPO, પૂર્ણા કન્સલ્ટન્ટ, DHEW સ્ટાફ, આંગણવાડી કાર્યકરો અને કિશોરીઓ ઉપસ્થિત રહ્યાં હતાં.
