જામનગર, સંજીવ રાજપૂત, એબીએનએસ: સેવા સંકલ્પ અભિયાન અંતર્ગત જિલ્લા હોમગાર્ડઝ અને આર.ટી.ઓ. વિભાગના સંયુક્ત ઉપક્રમે ગામેગામથી માતાના મઢ પગપાળા જતાં પદયાત્રીઓની સુરક્ષા અને સલામતી માટે તથા માર્ગ અકસ્માતો નિવારવાના ઉમદા હેતુથી એક વિશેષ સુરક્ષા કેમ્પનું આયોજન કરવામાં આવ્યું છે.
ખીજડીયા બાયપાસ પાસે આવેલા ટાટા મોટર્સ પાસે આજથી પાંચ દિવસ સુધી ચાલનારા આ રેડિયમ રિફ્લેક્ટર કેમ્પનો વિધિવત પ્રારંભ કરવામાં આવ્યો છે. રાત્રિના સમયે કે ધુમ્મસભર્યા વાતાવરણમાં રોડ પરથી પસાર થતાં પદયાત્રીઓ તેમજ વાહનો દૂરથી જ સ્પષ્ટપણે જોઈ શકાય તે માટે આ રેડિયમ રિફ્લેક્ટર લગાવવાની સરાહનીય કામગીરી તંત્ર દ્વારા હાથ ધરવામાં આવી છે.
આ પ્રસંગે આર.ટી.ઓ. ચૌધરી, નાયબ પોલીસ અધિક્ષક પંડ્યા, જિલ્લા હોમગાર્ડઝ કમાન્ડન્ટ ગીરીશ સરવૈયા સહિત મોટી સંખ્યામાં હોમગાર્ડઝના જવાનો અને અધિકારીઓ ઉપસ્થિત રહ્યા હતા. સંસ્થા દ્વારા તમામ પદયાત્રીઓ અને વાહનચાલકોને આ સુરક્ષા ઝુંબેશનો લાભ લેવા અને માર્ગ સલામતી જાળવવામાં સહયોગ આપવા અનુરોધ કરવામાં આવ્યો છે.
