ભાવનગર જિલ્લા કલેકટર કચેરી ખાતે જિલ્લા કલેકટરશ્રી ડૉ. મનીષકુમાર બંસલના અધ્યક્ષસ્થાને પી.સી.એન્ડ પી.એન.ડી.ટી. જિલ્લા એડવાઇઝરી કમિટીની સમીક્ષા બેઠક યોજાઈ હતી.
બેઠક દરમિયાન જિલ્લામાં ગેરકાયદેસર જાતિ નિર્ધારણની પ્રવૃત્તિઓ અટકાવવા માટે લેવાઈ રહેલા પગલાં, પી.સી. એન્ડ પી.એન.ડી.ટી. એક્ટના કડક અને અસરકારક અમલીકરણ, જિલ્લામાં લિંગાનુપાત જાળવવા હાથ ધરાતી કામગીરી તેમજ સોનોગ્રાફી સેન્ટરોની ઓચિંતી તપાસ અંગે વિસ્તૃત ચર્ચા કરવામાં આવી હતી.
બેઠકમાં પી.એન.ડી.ટી. કાયદા હેઠળ બે નવી અરજીઓને બહાલી, છ રીન્યુઅલ અરજીઓને બહાલી આપવામાં આવી હતી.
બેઠક દરમિયાન મુખ્ય ઈ.ચા જિલ્લા આરોગ્ય અધિકારી શ્રી ડૉ.કે.એમ.સોલંકીએ હોસ્પિટલોના નવા રજીસ્ટ્રેશન, રીન્યુઅલ રજીસ્ટ્રેશન, સોનોગ્રાફી મશીનોના રજીસ્ટ્રેશન તેમજ તબીબોને સોનોગ્રાફી મશીનના ઉપયોગ માટે પ્રાપ્ત થયેલ અરજીઓ તેમજ એડવાઇઝરી કમિટિ હેઠળ હાથ ધરાતી કામગીરીનો વિગતવાર અહેવાલ પણ રજૂ કરવામાં આવ્યો હતો.
આ બેઠકમાં જિલ્લા વિકાસ અધિકારી શ્રી હનુલ ચૌધરી, આરોગ્ય વિભાગના અધિકારીઓ, સંલગ્ન વિભાગોના પ્રતિનિધિઓ તેમજ એડવાઇઝરી કમિટિના સભ્યશ્રીઓ ઉપસ્થિત રહ્યાં હતાં.
