અમદાવાદ, સંજીવ રાજપૂત, એબીએનએસ: અમદાવાદના કાલુપુરમાં ગત રવિવારે વહેલી સવારે એક ટુ-વ્હીલર ચાલકને ટક્કર મારી રૂ. ૨,૩૯,૦૦૦ની રોકડ રકમની સનસનાટીભરી લૂંટ ચલાવવામાં આવી હતી. આ ગુનાનો ભેદ ઉકેલવામાં અમદાવાદ શહેરની લોકલ ક્રાઇમ બ્રાન્ચ (LCB) ઝોન-૩ પોલીસને મોટી સફળતા મળી છે. પોલીસે ગણતરીના કલાકોમાં જ આ લૂંટ કરનાર બે રીઢા આરોપીઓની ધરપકડ કરી તેમની પાસેથી લૂંટની રોકડ સહિત લાખો રૂપિયાનો મુદ્દામાલ જપ્ત કર્યો છે.
પોલીસ સૂત્રોના જણાવ્યા અનુસાર, ગત ૯ ઓગસ્ટના રોજ સવારે ૬:૧૫ વાગ્યે ફરિયાદી પોતાનું ટુ-વ્હીલર લઈને કાલુપુર ઘી કાંટા ચાર રસ્તા, બુટગલી પાસેથી પસાર થઈ રહ્યા હતા. આ સમયે આરોપીઓએ પોતાનું વાહન જાણી જોઈને ફરિયાદીના વાહન સાથે અથડાવીને તેમને નીચે પાડી દીધા હતા અને તેમની પાસેથી રોકડ ભરેલી થેલી ઝૂંટવીને રફુચક્કર થઈ ગયા હતા.
ચોક્કસ બાતમીના આધારે LCB ઝોન-૩ પોલીસે ૧૦ ઓગસ્ટના રોજ આરોપી મોહમદ શાહરુખ ઉર્ફે કેલા અંસારી અને જાફર ઉસ્માનભાઈ શેખ (બંને રહે. રખિયાલ)ની ધરપકડ કરી હતી. પોલીસે તેઓની પાસેથી રોકડા રૂ. ૨,૩૯,૦૦૦, બે મોબાઈલ અને ગુનામાં વપરાયેલ વાહન સહિત કુલ રૂ. ૩,૦૫,૦૦૦નો મુદ્દામાલ રિકવર કર્યો છે.
પોલીસની પ્રાથમિક તપાસમાં ખુલાસો થયો છે કે ઝડપાયેલા બંને આરોપીઓ રીઢા ગુનેગાર છે. મુખ્ય આરોપી મોહમદ શાહરુખ અગાઉ મણીનગર, ખોખરા અને નરોડામાં નકલી પોલીસ બનીને ગુના આચરવામાં ઝડપાઈ ચૂક્યો છે. તેની સામે ઓઢવ, અમરાઈવાડીમાં ચોરી અને મારામારીના ગુનાઓ પણ નોંધાયેલા છે. બીજા આરોપી જાફર શેખ સામે રખિયાલ પોલીસ મથકમાં પ્રોહિબિશનનો ગુનો નોંધાયેલો છે. હાલ પોલીસે બંને સામે કાલુપુર પોલીસ સ્ટેશનમાં ગુનો નોંધી કાયદેસરની કાર્યવાહી હાથ ધરી છે.
