અમરેલી જિલ્લાના સાવરકુંડલા, ધારી અને લાઠી, બગસરા, બાબરા બસ સ્ટેશન ખાતે ગ્રામહાટનો પ્રારંભ

ગ્રામીણ સ્વસહાય જૂથોની બહેનો દ્વારા ઉત્પાદિત હસ્તકલા અને ચીજવસ્તુઓના વેચાણ માટે મળશે બજાર

સાવરકુંડલા ખાતે જિલ્લા પંચાયતના પ્રમુખશ્રી દક્ષા બહેન ચોડવડિયા, ધારી-બગસરા ખાતે ધારાસભ્યશ્રી જે.વી. કાકડિયાના હસ્તે ગ્રામ હાટનો પ્રારંભ

અમરેલી, તા. ૧૧ ઓક્ટોબર, ૨૦૨૬ – ગ્રામ્ય વિસ્તારની મહિલાઓને આર્થિક રીતે પગભર બનાવવા અને સ્વસહાય જૂથો દ્વારા ઉત્પાદિત ચીજવસ્તુઓને વેચાણ માટે યોગ્ય બજાર ઉપલબ્ધ કરાવવાના હેતુથી અમરેલી જિલ્લાના સાવરકુંડલા, ધારી અને લાઠી બસ સ્ટેશન ખાતે ગ્રામહાટનો પ્રારંભ કરવામાં આવ્યો છે. રાષ્ટ્રીય ગ્રામીણ આજીવિકા મિશન (એન.આર.એલ.એમ.) યોજના અંતર્ગત ગ્રામ વિકાસ વિભાગ, રાજ્ય સરકાર તથા ગુજરાત રાજ્ય માર્ગ વાહનવ્યવહાર નિગમના સહયોગથી ગ્રામહાટની સુવિધા ઊભી કરવામાં આવી છે.

સાવરકુંડલા બસ સ્ટેશન ખાતે જિલ્લા પંચાયતનાં પ્રમુખ શ્રીમતી દક્ષાબેન ચોડવડિયાના હસ્તે ગ્રામહાટનું ઉદ્ઘાટન કરવામાં આવ્યું હતું. આ પ્રસંગે તાલુકા પંચાયત પ્રમુખ શ્રીમતી દક્ષાબેન મહીડા, બાંધકામ સમિતિ ચેરમેન શ્રી પ્રકાશભાઈ પાનસુરીયા, તાલુકા પંચાયત સભ્ય શ્રી પ્રતાપભાઈ ખુમાણ,શ્રી જીવનભાઈ વેકરીયા,રાજુભાઈ નાગ્રેચા,મેહુલભાઈ ત્રિવેદી, પ્રવીણભાઈ સાવજ, અગ્રણી શ્રી રજનીભાઈ ડોબરીયા, અનિરૂદ્ધસિંહ જાડેજા ઉપસ્થિત રહ્યા હતા.

ધારી બસ સ્ટેશન ખાતે ધારાસભ્ય શ્રી જે.વી. કાકડિયાના અને જિલ્લા પંચાયતના ઉપપ્રમુખ શ્રી મહાવીરબાપુ ભગતના હસ્તે હસ્તે ગ્રામહાટનું લોકાર્પણ કરવામાં આવ્યું હતું. આ પ્રસંગે તાલુકા પંચાયતનાં પ્રમુખ શ્રી સાવલિયા, તાલુકા પંચાયતના સભ્યશ્રીઓ, તાલુકા વિકાસ અધિકારીશ્રી, જિલ્લા કક્ષાએથી ડી.એલ.એમ. શ્રી છાયાબેન ટાંક, શ્રી પટેલ વિભાગીય નિયામકશ્રી, જી.એસ.આર.ટી.સી, અગ્રણી શ્રી મૃગેશભાઈ કોટડીયા, શ્રી મુકેશભાઈ રૂપારેલિયા, શ્રી ચંદ્રેશભાઈ વાળા, તાલુા પંચાયતના કર્મયોગીઓ અને સખીમંડળના બહેનો ઉપસ્થિત રહ્યા હતા.

લાઠી બસ સ્ટેશન ખાતે તાલુકા પંચાયતના પ્રમુખશ્રી, તાલુકા પંચાયતના સભ્યશ્રીઓની ઉપસ્થિતિમાં ગ્રામહાટનું લોકાર્પણ કરવામાં આવ્યું હતું. આ પ્રસંગે તાલુકા વિકાસ અધિકારીશ્રી, તાલુકા લાઇવલીહૂડ હબ મેનેજર તથા તાલુકા પંચાયતના સ્ટાફ અને સખી મંડળોની બહેનો ઉપસ્થિત રહ્યાં હતાં.

બગસરા બસ સ્ટેશન ખાતે એન.આર.એલ.એમ. યોજના અંતર્ગત ગ્રામીણ સ્વસહાય જૂથોની બહેનો દ્વારા ઉત્પાદિત વિવિધ હસ્તકલા તથા અન્ય ચીજવસ્તુઓના વેચાણ અર્થે બનાવવામાં આવેલ ગ્રામહાટનું લોકાર્પણ ધારાસભ્યશ્રી જે.વી. કાકડિયા તથા જિલ્લા પંચાયતના ઉપપ્રમુખશ્રી મહાવીરબાપુ ભગત, જિલ્લા પંચાયતના સભ્યશ્રી વનરાજભાઈ વાળા, તાલુકા પંચાયતના પ્રમુખશ્રી રમેશભાઈ સતાસિયા, ઉપપ્રમુખશ્રી ચંપુભાઈ ડવ તથા તાલુકા પંચાયતના સભ્યશ્રીઓના વરદહસ્તે કરવામાં આવ્યું હતું. આ પ્રસંગે અગ્રણીશ્રીઓ, તાલુકા વિકાસ અધિકારીશ્રી, જિલ્લા કક્ષાએથી ડી.એલ.એમ. શ્રીમતી છાયાબેન ટાંક, એસ.ટી. વિભાગના વિભાગીય નિયામકશ્રી, ડેપો મેનેજરશ્રી, તાલુકા પંચાયતનો સ્ટાફ તથા સખી મંડળોની બહેનો બહોળી સંખ્યામાં ઉપસ્થિત રહ્યાં હતાં.

બાબરા બસ સ્ટેશન ખાતે એન.આર.એલ.એમ. યોજના અંતર્ગત ગ્રામીણ સ્વસહાય જૂથોની બહેનો દ્વારા ઉત્પાદિત વિવિધ હસ્તકલા તથા અન્ય ચીજવસ્તુઓના વેચાણ અર્થે બનાવવામાં આવેલ ગ્રામહાટનું લોકાર્પણ તાલુકા પંચાયતના પ્રમુખશ્રી, ઉપપ્રમુખશ્રી, સ્થાનિક અગ્રણીઓના હસ્તે કરવામાં આવ્યું હતું.

ગ્રામહાટના માધ્યમથી સ્વસહાય જૂથોની બહેનો દ્વારા ઉત્પાદિત વિવિધ હસ્તકલાની વસ્તુઓ, ઘરવપરાશની ચીજવસ્તુઓ અને અન્ય સ્થાનિક ઉત્પાદનોના વેચાણ માટે યોગ્ય સ્થળ ઉપલબ્ધ બનશે. બસ સ્ટેશન જેવા જાહેર સ્થળે વેચાણની સુવિધા મળવાથી સ્થાનિક ઉત્પાદનોને વધુ ગ્રાહકો સુધી પહોંચાડવામાં મદદ મળશે. આ પહેલથી મહિલાઓની આવકમાં વધારો કરવાની તકો ઊભી થવાની સાથે તેમની ઉદ્યોગસાહસિકતાને પણ પ્રોત્સાહન મળશે.

ગ્રામ્ય મહિલાઓને આત્મનિર્ભર બનાવવા, સ્થાનિક ઉત્પાદનોને પ્રોત્સાહન આપવા અને સ્વસહાય જૂથોની આર્થિક પ્રવૃત્તિઓને વધુ મજબૂત બનાવવા માટે ગ્રામહાટ મહત્વપૂર્ણ માધ્યમ બની રહેશે.