ભાવનગર મંડળ, પશ્ચિમ રેલવેની વન્યજીવ સંરક્ષણ પ્રત્યેની પ્રતિબદ્ધતાનું વધુ એક ઉત્તમ ઉદાહરણ
ભાવનગર મંડળ, પશ્ચિમ રેલવે દ્વારા એશિયાઈ સિંહો તેમજ અન્ય વન્યજીવોની સુરક્ષાને સર્વોચ્ચ પ્રાથમિકતા આપીને સંવેદનશીલ વન્યજીવ વિસ્તારોમાં ટ્રેનોનું સંચાલન અત્યંત સતર્કતા અને નિર્ધારિત ગતિમર્યાદા સાથે કરવામાં આવી રહ્યું છે. મંડળ રેલ પ્રબંધક શ્રી દિનેશ વર્માના માર્ગદર્શન હેઠળ તેમજ વરિષ્ઠ મંડળ વિદ્યુત ઈજનેર (ટ્રેક્શન) શ્રી વિજેન્દ્ર કુમાર મીણાના નેતૃત્વમાં લોકો પાયલટોને વન્યજીવ વિસ્તારોમાં વિશેષ સાવચેતી રાખવા માટે સતત જાગૃત અને નિર્દેશિત કરવામાં આવે છે.
આ સતર્કતાનું એક પ્રશંસનીય ઉદાહરણ 05 ઓક્ટોબર 2026ના રોજ સામે આવ્યું, જ્યારે પીપાવાવ સાઇડિંગ–પીપાવાવ પોર્ટ રેલખંડ પર ત્રણ એશિયાઈ સિંહો રેલવે ટ્રેક પાર કરતા જોવા મળ્યા. માલગાડીનું સંચાલન કરી રહેલા લોકો પાયલટ શ્રી વિવેક વર્મા અને સહાયક લોકો પાયલટ શ્રી રાહુલ કુમાવતએ કિલોમીટર નંબર 24/04 પર ટ્રેક પર સિંહોને જોતા જ પરિસ્થિતિનું તાત્કાલિક મૂલ્યાંકન કર્યું અને ઇમરજન્સી બ્રેક લગાવીને ટ્રેનને સુરક્ષિત રીતે રોકી દીધી. તેમની ત્વરિત કાર્યવાહી અને સતર્કતાને કારણે એશિયાઈ સિંહો સંભવિત રેલ અકસ્માતનો ભોગ બનતા બચી ગયા.
ઘટના બાદ તરત જ લોકો પાયલટ દ્વારા ટ્રેન મેનેજર (ગાર્ડ) તથા સ્ટેશન મેનેજર, પીપાવાવ પોર્ટને જાણ કરવામાં આવી. માહિતી મળતાં જ વન વિભાગના ફોરેસ્ટ ટ્રેકર શ્રી જય સિંહ ઘટનાસ્થળે પહોંચ્યા અને સિંહોને સુરક્ષિત રીતે રેલવે ટ્રેક પરથી દૂર કર્યા. પરિસ્થિતિ સામાન્ય થયા બાદ માલગાડીને સાવચેતીપૂર્વક તેના ગંતવ્ય તરફ રવાના કરવામાં આવી.
ભાવનગર મંડળમાં રેલવે અને વન વિભાગ વચ્ચેના અસરકારક સંકલન તેમજ લોકો પાયલટોની સતર્કતાના પરિણામે અનેક એશિયાઈ સિંહોને સંભવિત રેલ અકસ્માતોથી બચાવવામાં આવ્યા છે. વરિષ્ઠ મંડળ વાણિજ્ય પ્રબંધક શ્રી અતુલ કુમાર ત્રિપાઠીના જણાવ્યા અનુસાર, નાણાકીય વર્ષ 2024-25 દરમિયાન 159, નાણાકીય વર્ષ 2025-26 દરમિયાન 129 તથા વર્તમાન નાણાકીય વર્ષ 2026-27માં એપ્રિલ માસથી અત્યાર સુધી 80 એશિયાઈ સિંહોને સંભવિત રેલ અકસ્માતોથી સુરક્ષિત બચાવવામાં આવ્યા છે.
મંડળ રેલ પ્રબંધક શ્રી દિનેશ વર્મા તથા અપર મંડળ રેલ પ્રબંધક શ્રી ઋત્વિક શર્મા સહિત મંડળના વરિષ્ઠ અધિકારીઓએ લોકો પાયલટોની સતર્કતા, ત્વરિત નિર્ણય લેવાની ક્ષમતા, સંવેદનશીલતા તથા કર્તવ્યનિષ્ઠાની પ્રશંસા કરતાં તેમને અભિનંદન પાઠવ્યા છે.
ભાવનગર મંડળ, પશ્ચિમ રેલવે, વન્યજીવ સંરક્ષણ પ્રત્યેની પોતાની પ્રતિબદ્ધતાને સતત વધુ મજબૂત બનાવતાં રેલવે અને વન વિભાગના સંકલિત પ્રયાસો દ્વારા એશિયાઈ સિંહો સહિત અન્ય વન્યજીવોની સુરક્ષા સુનિશ્ચિત કરવા માટે સતત પ્રયત્નશીલ છે.
